الرئيسية روايات طويلة كاملة قصه “صحاب البيت” للكاتب فهد حسن

قصه “صحاب البيت” للكاتب فهد حسن


فكرت كتير قبل مااحكى واكتب اللى حصل ليا ولاسرتى .. اكتبه واقوله ولا لا.. 


لكن في النهايه حبيت افضفض واقول عن الرعب اللى شوفناه وعيشناه ….


لان فعلا اللى شوفناه انا وجوزى وولادى كان اكبر من الخيال.. او اى شئ بنسمعه عن العفاريت والجن.


ودى قصتى انا واسرتى :


انا ساميه ربه منزل ام ل 3 بنات وولدين 


رنا الكبيره 26سنه
واحمد 24
باسم 19
منه 14
وزينه 3 سنين
وطبعا جوزى سامح وهو مدير شركه من شركات التأمين
تعريفى للاسره مهم لان كل شخص فينا حصلت معاه حاجه غريبه ادت للقصه اللى انا بحكيها دلوقتى…


كنا دايما بنطلع نصيف في اسكندريه .. وبنحجز تبع الشركه بتاعته …
ولكن جت فتره الشركه اللى بيشتغل فيها جوزى وقفت موضوع المصيف عشان حصل بينها وبين الشركه المتعاقده معاها مشاكل في الفلوس وكده


وبعد 4 سنين تعاقدوا مع شركه جديده والمصيف
المره دى بقي في العين السخنه وامتيازاته افضل كتير عن اللى قبله..


شااليه وليه شاطئ خاص وعليه سور محدش شايفك ولا انت شايف حد .. وفي حمام سباحه كمان
ف الموضوع حلو وجميل ….


وحجز فعلا سامح جوزى 15يوم .. مش اسبوع زى كل مره عشاان بقالنا كتير متجمعناش وقضينا وقت ممتع مع بعض ….


احنا اول ناس هيروحوا الشاليه .. او كنت فاكره اننا اول ناس!! 


تم الحجز فعلا .. وفرحتنا كبيره اننا بعد 4 سنين هنطلع نصيف ونسمتع اننا نتجمع ونصفي ذهننا من متاعب الحياه… 


حضرنا حاجتنا ولبسنا وجبنا الخزين وكل الحاجات لزوم السفر وجوزى قال احنا هنسافر بعربيتنا مش حابب نروح بالاتوبيس .. وكده كده كل واحد معاه رقم الشاليه بتاعه ف الافضل نبقي مع نفسنا …


ووصلنا .. وكان المشهد جميل وفي راحه نفسيه كبيره… احساس انك تفصل عن زحمه الحياه ده في حد ذاته ممتع… وبدأنا ندور ع الشاليه..


الغريب والحلو في نفس الوقت ان الشاليه بعيد عن مجمع الشاليهات اللى باقي الموظفين نازلين فيه واحسن عشان نبقي براحتنا….


الشاليه كان تحفنا .. بيتكون من دورين 


الدور اللى فوق فيه 5 اوض وحمام
والدور اللى تحت فيه صاله كبيره جدا وحمامين ومطبخ وبره في جنينه فيها حمام سباحه وبره الشاطئ الخاص بينا.. بصراحه تحفه …


المنظر فعلا خيالى وده تقريبا تعويض للوقت الخنيق اللى الواحد قضاه في مشاكل الحياه وصعوباتها اخيرا النفسيه هترتاح..


بدأنا نفضي الشنط ونظبط حاجتنا ونرصها.. وبعد مخلصت نزلت تحت استكشف بقي المطبخ والدور اللى تحت كله .. ومن شباك المطبخ لقيت مرجيحه جميله اووى.. عجبتنى وقولت اروح ابص اكيد في حاجه حلوه تانى… 


وروحت للمرجيحه ولقيت حاجه غريبه اووى 
“امشوا .. ازعجتونا”


ده اللى كان مكتوب ع المرجيحه وفضلت التفت حوليا قولت يمكن عيل صغير كتبها ولا حاجه لما لقي الشاليه بتاعنا احلى من باقي الشاليهات …


لكن عشان حد يخش هنا لازم يخش من الشاليه نفسه ويفتح الباب المطبخ فمستحيل يكون ده حصل.. استغربت بصراحه جدا وروحت انادى ع رنا ورجعنا للمرجيحه وملقتش عليها اى كلام !!!!


رنا قالتلى مايمكن بيتهيألك ياماما ..مفيش حاجه اهو هو فين بقي اللى بتقولى عليه ده ؟؟


يلا يلا نعمل الاكل… ومشيت رنا قدامى وانا لسه مش مستوعبه الموقف .. كان بيتهيألى ولا ده كان بجد..


ومشيت .. ووبص ورايا تانى ع المرجيحه ولقيت بنت صغيره بتتمرجح وبتبصلى وبتضحك وقامت جريت ورا الشاليه .. ااااااااه .. ده كان رد فعلى اول ما البنت الصغيره قامت جريت… ورجعت رنا وهى بتقول :
ماما ..ماما مالك بتصرخى ليه .. مقدرتش اتكلم وشاورتلها ع المرجيحه اللى كانت لسه بتتحرك ..


رد رنا ان ده ممكن يكون من الهوا عادى ياماما مالك خايفه ليه كده .. وخدت ايدى وقومتنى …


معرفتش اقولها ع البنت اللى شوفتها مش هتصدقنى حتى لو صدقت مينفهش اخوفها.. لازم ابقي اقوى من كده.. ويمكن يكون بيتهيألى.. !!


قولتلها اعصابي بايظه بس .. تعالى .. تعالى نروح نعمل الاكل يلا


بدأنا في تجهيز الاكل فعلا .. واحمد وباسم ومنه راحوا ينزلوا حمام السباحه.. وسامح اخد زينه ودخلوا يناموا.. وبعد ساعه جت زينه وماسكه في ايدها عروسه لعبه شكلها غريبه اوى …!


سألتها زينه ياحبيبتى جبتى العروسه دى منين ؟
مش المفروض انك نايمه مع بابا؟!


قالتلى :
بابا نام وانا كنت صاحيه وجت صاحبتى وخدتنى ولعبنا شويه وسابتلى العروسه دى وقالتلى انها هترجع تانى.. وجيت اقعد معاكوا لحد ماهى ترجع. 


بصينا لبعض انا ورنا وعلامات الاستغراب شايفنها ع ملامح بعض وسألتها صحبتك مين يا زينه ؟!


قالتلى : صاحبتى نور اللى طلعت من المرايه …


خوفت اوووى من كلام زينه وحضنتها واخدت منها العروسه.. وقولت لرنا صدقتينى ؟!


واخدت زينه وطلعت ع سامح صحيته وحكيت له اللى حصل وقولتله احنا لازم نرجع القاهره حالا..


كنت قدامه ماسكه نفسي ومن جوايا خوف وقلق ع ولادى وفجأه رنا صرخت…!!


نزلنا نجرى احنا التلاته نشوف في ايه ؟! ولقينا رنا مغمى عليها ع الارض في المطبخ !!!


سامح خدها ع الاوضه وانا ندهت الاولاد من حمام السباحه والحمدلله رنا فاقت وبدأت تحكى:


انا كنت واقفه بغسل السمك وحسيت ان في حد ورايا بحسبها ماما وبقولها ها عملتى ايه؟!


مكنش فيه رد وسمعت صوت خطوات بلف ورايا لقيت ست لابسه فستان ابيض فتحت الباب وخرجت صرخت ومحستش ب اي حاجه تانى…


كلنا واقفين والخوف سيطر علينا كلنا… كسر الصمت ده سامح وهو بيقول ياجماعه انتوا بيتهيألكوا انتى ياساميه نقلتى الخوف لرنا .. فتهيألها الست دى..


وزينه عيله صغيره يعنى اكيد بتتوهم ده ولو ع اللعبه ممكن تكون لقيتها هنا ولا هنا عادى يعنى ماكلنا واحنا صغيرين كنا بنخترع حاجات وشخصيات مش حقيقيه عشان نلعب… متحطوش في بالكوا واستمتعوا بوجودنا هنا.. ومتخافوش مفيش حاجه يلا انزلوا كملوا الاكل .. وانتوا خشوا خدوا دش عشان المايه بتاعه حمام السباحه…


يلا ياساميه انا جعان… وسبيلى زينه…


سامح خد زينه ورجع ناموا .. ونزلت انا ورنا نكمل الاكل واحنا بنحاول نطمن نفسنا … ومع مرور الوقت وان مفيش حاجه غريبه تانى حصلت بدأنا فعلا نطمن… وعملنا الاكل واخدت العروسه حرقتها عند المرجيحه ووقفت قدامها لحد متتصفي خالص..


اكلنا وكان الليل دخل .. قضينا وقت حلو واختفي كل الخوف من جوانا ونسينا تقريبا اللى حصل… لعبنا وهزرنا وغنينا وضحكنا.. وفات اليوم ع كده..


ونمنا .. وصحيت ع صوت بنت بتضحك .. ولما ركزت في الصوت لقيته صوت زينه !!
وكان جاى من الدور اللى تحت .. قومت جريت بسرعه ع تحت والصوت كان اوضح كان جاى من ناحيه المطبخ.. روحت بسرعه وانا متأكده انه من عند المرجيحه…


وفتحت باب المطبخ ولقيت زينه قاعده ع المرجيحه واول ما شافتنى قالت :


ياماما ليه كده اهى نور خافت ومشيت .. جيتى ليه انا عايزه العب مع صاحبتى ….


سمعت كلامها وانا متنحه ومش عارف اقول ايه ؟!


جريت عليها وخدتها في حضنى ورجعت بسرعه 
ع المطبخ وانا قلبي هيقف من الخضه 
وجسمى بيرتعش..!!!


ولقيتها واقفه قدامى نفس الست اللى رنا قالت عليها وفي ايدها البنت الصغيره !!!!


مش قادره اصرخ ولا اتحرك .. كانت لابسه فستان ابيض وشعرها مغطى وشها شكلها كان مرعب ومخيف. والبنت واقفه وبتنادى ع زينه والست ماسكه ايدها مش مخليها تعرف تتحرك..!!


وفجأه الست اخدت البنت ومشيت وخرجت من باب الشاليه !! اول مخرجت سمعت صوت منه بتصرخ..


اخدت زينه وجريت ع فوق وكان سامح والاولاد صحيوا ع نفس الصرخه ولقينا منه واقفه ع الباب الحمام وبتصوت وبتصرخ.. وفي حاله رعب وخوف وفزع …!!! 


وعماله تقول البنت كان غرقانه في البانيو ..
رددتها كتير جدا الجمله وحاولنا نهديها وبعد ما هديت قالت انها قامت دخلت الحمام واول مقفلت الباب لقت البانيو مليان مايه وفي بنت صغيره غرقانه فيه وميته ففضلت تصرخ والباب مكنش راضي يفتح وبعدين البنت اختفت والباب اتفتح وهى مبطلتش صريخ..!! 


سامح بص ليا وكأنه بيقول انتى عندك حق ودخل الحمام ورجع وهو ع ملامحه استغراب وقلق !!


وقال مكتوب ع مرايه الحمام 


” امشوا .. ازعجتونا “
ودى نفس الجمله اللى انتى قرتيها ع المرجيحه ياساميه بس زياده عليها من تحت كان مكتوب


“صحاب البيت ” 


وكأنه امضاء!!! انا مستغرب من اللى بيحصل !!


بقيت شايفه في عيون كل الاولاد خوف وفزع الا زينه كانت مبسوطه ولقيت في ايدها العروسه اللى انا حرقتها بنفسي !!!!!


قلبي اتخطف اول ما شوفت العروسه في ايديها خدتها من ايديها بسرعه وقولت لسامح احنا لازم نمشي من هنا دلوقتى واديك شايف كل اللى حصل وبيحصل والعروسه دى انا حرقتها ب ايدى ولا مكدبنى المره دى كمان ؟؟


سامح ملحقش يرد .. زينه اللى ردت وقالت :


ايوه ياماما لازم نمشي نور صاحبتى قالتلى ان لو مش مشينا مامتها هتقتلنا زى ما قتلتها .. بس انا بحبها ياماما ومش عايزه اسيبها قولى لمامت نور اننا ناخد نور معانا وكده كده مامت نور مش بتحبها..
سامح رد وقال لزينه كملى يازينه قالتك ايه تانى ؟!


زينه بتكمل وبتقول :


ان كل ما ناس يجوا هنا مامت نور بتمشيهم محدش بيقدر يقعد خالص .. ونور زعلانه ان مامتها بتخلى الناس تمشي.. والنبي يابابا ناخد نور تعيش عندنا..


مامتها موتتها في البانيو هى ورتنى ماتت ازاى ومنه كمان شافتها .. من انتى شفتيها يامنه ؟


زينه سكتت ومكنش في كلام يتقال بعد اللى قالته 
حاجه واحده بس اللى نقدر نعملها اننا نمشي وحالا…


ولمينا هدومنا ومشينا من غير تفكير وقفلنا كل الانوار وخرجنا وقفلنا الباب .. وبسرعه ركبنا العربيه وقولت لسامح لازم تقول للشركه ان الشاليه ده يسبوه وتبلغوا البوليس يشوفوله حل وصرفه ويشوفوا الجريمه اللى حصلت هنا دى حصلت ازاى ؟


زينه ردت وقالت ياماما :


مامت نور كانت مجنونه ولما موتت نور بعد بقي لما مموتها .. موتت نفسها هى كمان..
نور حكت لى ع كل حاجه…. 


حضنت زينه وقولت لسامح مشينى من المكان ده بسرعه…. ومشينا فعلا وخدنى الفضول وبصيت ع الشاليه …
ااااااااااه بص ياسامح بص 
بص بسرعه … سامح وقف العربيه..


وبصينا كلنا ورانا ع الشاليه اللى مكناش بعدنا عنه كتير … 


ونور الاوضه من الاوض منور اللى انا طافياه ب ايدى وواقف ورا الازاز البنت وقي ايدها العروسه والست جمبها.. وفجأه النور انطفي …


ولقيناهم واقفين قدام الباب تحت !!!! 


كلنا صرخنا وسامح شغل العربيه ومشينا بسرعه..


عمرى مهنسي اليوم ده .. يوم عيشته انا واسرتى وكأنه بألف سنه… 


ورجعنا وسامح بلغ الشركه .. والشركه بلغت البوليس ع طول اللى بعد تحريات قالوا فعلا في الشاليه ده من 5سنين.. في ست كانت قواها العقليه مش سليمه وده كان بشهاده المصيفين اللى بيجوا هنا .. 
ان تصرفاتها مش طبيعيه وصوتها عالى دايما وبتفضل تصرخ…قتلت بنتها..الناس كانوا فاكرينها بنتها بس بعد الفحص مطلعتش بنتها.. ومعرفناش نوصل لاى حاجه لان هى كمان انتحرت وقتلت نفسها !! وشمعوا الشاليه ومنعوا ان اى حد يدخلوا 


لانهم قالوا ان دى مش الشكوى الاولى .. وان اللى اتقال ده برضه هو هو نفس الكلام اللى قبل كده من مصيفين تانيين .. 


والغريبه ان الست دى فضلت تيجى الشاليه لمده 3سنين متواصلين في موسم الصيف ومحدش يعرف هى مين .. حتى الشركه اللى كانت بتأجرلها الشاليه قالوا .. ان الحجز كان ب اسم واحد اسمه سيد الاخضر .. ولما دورنا ع الاسم والعنوان لقيناه ميت اصلا .. والشركه اكدت انها شافته واتعاملت معاه .. لما كان بيحجز ويدفع الفلوس وفي الآخر لقيناه مش موجود اصلا .. !!


الموضوع غريب والشرطه نفسها مقدرتش تحل اللغز ده !!؟


مفهمتش ليه اتحركوا متأخر بس المهم انهم اتحركوا..


واتقفل الشاليه .. وتقريبا البنت كانت مخطوفه ومتعرفش ان دى مش امها.. لان زينه مقالتش ان نور قالتلها انها مش امها بالعكس حكاوى زينه كلها كانت بتأكد ان الست دى ام نور !!


وفات سنتين محصلش فيههم اى شئ غريب غير انى لما رجعت هنا لقيت العروسه في اوضه زينه !!!!


ومعرفتش اتخلص منها لانى عارفه كل ما هتخلص منها هلاقيها .. كنت بخاف الاول لكن لما محصلش حاجه سبتها ……

رايك يهمنا ♥

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.