رواية فندق تار / للكاتب فهد حسن كاملة - بيت العز
الرئيسية قصص وروايات رواية فندق تار / للكاتب فهد حسن كاملة
26220092 573071239713428 4988303542678069847 n - رواية فندق تار / للكاتب فهد حسن كاملة

رواية فندق تار / للكاتب فهد حسن كاملة

الجزء الاول

الجزء التانى

ورينى طيب كده الورقه دى …

ياحبيبتى عادى هو يعنى هنصدق الكلام الفاضي ده ؟ احنا بنقضي شهر العسل .. وانتى مراتى وحبيبتى . والفندق شكله فخم ومحترم .. ف تلاقي دى مثلا لعبه ولا مفاجأه بيعملوها مع العرسان الجداد .. متخافيش انسي كل ده وادى ياستى الورقه اهى اتقطعت مليون حته .. متزعليش نفسك ..

يلا ننزل هوديكى مكان تحفه .. يلا بقي قومى البسي وانا هخش آخد دش … 

دخلت الحمام وانا بصراحه مستغرب من شكل الورقه .. وطريقه كتابه الكلام .. !!
هو ازاى صرخ وكتب صرخته ؟! طب ايه حصل له بعد ما صرخ ؟! وايه جاب الورقه دى هنا ؟! 

اااااااااااااااااااااه الحقنى ياسامح .. اااااااااااااااااه..

جريت ع بره لان ميرنا كانت بتصرخ .. جريت زى المجنون وخرجت من الحمام .. وملقتهاش !!!

فضلت انادى عليها .. لكن مفيش فايده ملقتهاااش !!
ولقيت الورق اللى متقطع .. مترتب !!!!

مترتب ومكتوب بيه “تارا” !!!!

ده الاسم اللى كان مكتوب في الورقه !! وكان اسم الفندق هنا !! 

وفجأه سمعت صوت ميرنا .. ! بتأن .. او بتتوجع ! 
ولقيت خيال واحده ع باب الحمام ..!!

افتكرتها ميرنا وجيت اجرى ع باب الحمام .. لكن بدأت تتكلم فوقفت ..!! 
وقالت :

مراتك ماتت .. وانت كمان هتموت ..
واختفى الخيال !! 
مش مصدق اللى بيحصل !! ومش عارف اتصرف واعمل ايه ؟! 

تليفونى رن .. رقم ميرنا!!.. انا مبقتش فاهم حاجه !!
رديت بسرعه ولقيت صوت حماتى وبتقولى :

هو انت لحقت تزعل البت ؟ لا وكمان لدرجه انها تسيبك وتيجى وترجع بيت ابوها تانى .. ووصله توبيخ .. واتخدعنا فيك .. وكل الكلام الحلو ده .. 

وانا مش عارف ارد ولا اقول ايه..؟!!
ميرنا رجعت من محافظه لمحافظه في 3 دقايق !!
لبست هدومى بسرعه وسافرت ورجعت ع بيت حماتى . واول مدخلت لقتها بتقولى في ايه ياابنى وجيت ليه وفين ميرنا ؟!

نعم !! هو ايه اللى بيحصل بالظبط ؟! 
انا صحيت الصبح ملقتش ميرنا .. ولقيتك بتتصلى من رقمها وبتقوليلى انها رجعت هنا .. ودلوقتى بتقوليلى ميرنا فين ؟! انا مش فاهم اى حاجه ؟؟!

بصي ياحماتى انا مش هعرف افهمك .. 
انا لازم ارجع تانى .. ولازم الاقي ميرنا .. 

جريت ونزلت ع العربيه .. ومشيت في طريقي للرجوع للفندق .. ووصلت .. وطلعت السلم جرى وأول ما دخلت الاوضه لقيت ميرنا لابسه ومستنيانى وبتقولى :

ايه ياعم هو كل ده بتجيب حاجه من العربيه وطالع تكمل لبس ؟! ساعه عشان تجيب حاجه من تحت وتطلع ؟!

نظره عجيبه منى للكلام اللى بتقوله .. ومش لاقي كلام ارد بيه .. بس حاولت اعدى الموقف بسرعه وقولتلها :

لا لا ده انا بس كنت بظبط حاجه كده .. يعنى عاملك مفاجأه .. معلش انا جاهز خلاص يلا .. يلا ننزل…

قفلت باب الاوضه وانا دماغى هتسيح من التفكير !
هو في ايه ..؟ وازاى كل ده بيحصل؟؟؟ 

ونزلت وانا لازم ادارى واعدى .. لازم مابينش كل الغريب والعجيب اللى بيحصل .. وفعلا خلصنا فسحتنا ورجعنا للفندق اللى كان فاضي تماما !!!

وكأن الفندق مهجوور !! مشينا في اتجاه الاوضه بتاعتنا .. ميرنا قالتلى انا مش مطمنه انا عايزه امشي من الفندق ده .. وافقتها وقولتلها يلا نطلع ناخد الشنط ونمشي .. وبينى وبين نفسي قولت الاحسن فعلا نمشي .. ونتجنب كل الحاجات اللى مش طبيعيه اللى بتحصل دى .. 

وصلنا للدور التانى اللى كان فيه اوضتنا .. لكن تقريبا في حاجه رافضه خروجنا من هنا ..!!
في بنت واقفه ع باب اوضتنا .. من بعيد كده مش باينلها ملامح بس ممكن نقول ان هى في التلاتينات
مراتى جت تكلمها منعتها وقولتلها اصبري .. اصبري لان وقفتها وشكلها من بعيد كده ميطمنش .. 

فجأه بدأ يخرج منها صوت غريب .. وكلمات اغرب ..!
بتصرخ وبتعيط .. وبدأ الفندق كله يتهز بينا .. زلزال لدرجه ان السقف بدأ يقع منه حاجات علينا طوب صغير .. وكان في لوحات ع الحيطان .. وقعت واحنا ماسكين في بعض ومش عارفين نتحرك !!

وبدأ يخرج من الحيطه دراعات .. دراعات بنى ادمين كلها دم .. وكأنهم عايزين يخرجوا ومش عارفين ..

وبدأت هى تتحرك في اتجاهنا وبرغم ان الطورقه ضيقه ومش عريضه الا انها ماشيه في وسط الدراعات دى ومش لمساها .. كأنها خيال !!

وفجأه النور ضلم لثانيه والزلزال والهزه وقفت .. وهى اختفت !! ورجع المشهد طبيعى زى ما كان !!!

اخدت ميرنا من ايدها وجريت ع تحت.. الفندق كان زحمه جداا .. ومليان ناس !
ع عكس ما كان عليه قبل ما نطلع .. هو ايه اللى بيحصل ؟! .. الناس تحسهم مش شايفيناا .. 
تحس ان احنا موجودين بس طيف !!

وخرجنا للشارع .. ونده علينا ب اسامينا صوت جاى من فوق . !! التفت انا وميرنا عشان نشوف مين ده اللى بينادى ويعرفنا !؟

لقينا نفس البنت هى هى .. باصه من بلكونه اوضتنا والفندق مكتوب عليه “فندق تارا” !!!! 
ده هو هو اللى كان مكتوب في الورقه اللى لقيناها في الاوضه … اااااااااااااااااااه حاسب ياسامح حاسب

رامى .. بص الورقتين دول كده لقياهم في درج الكومودينو .. مكتوب فيهم حاجه غريبه جداا .. وكأنها رساله موجهه لحد .. 

الاحداث فيهم مختلفه بس تقريبا النهايه والمضمون واحد .. مش عارفه ليه انا مش مطمنه.. ما تيجى ننزل نسأل او نسلم الورق ده للى شغالين هنا …

ياستى شيلى من دماغك الكلام ده .. ده تلاقي حد رخم بيهزر ولا حاجه.. ولا اقولك هاتى هاتى …

اهم ياستى هقطعهم مليون حته .. ونولع فيهم كمان وادى الورق في الطفايه .. وادى الولاعه .. اهو ولعوا اهو .. انسي وخلينا نستمتع بشهر العسل بقي…

رامى بص كده ع المرايه وراك …. 

مكتوب بالورق اللى انت ولعت فيه “تارا” !!!!

شاهد أيضاً

21765236 522862811400938 4530276796691049697 n - قصة الشيطان للكاتب فهد حسن

قصة الشيطان للكاتب فهد حسن

المقدمة الاماكن العشوائيه غالبا بيسود فيها حاجات ومعتقدات غريبه ….في منها ناتج عن جهلوفي منها …

رايك يهمنا ♥

This site uses Akismet to reduce spam. Learn how your comment data is processed.